گنج پن سے بچانے میں مددگار یہ سستا تیل آزما کر دیکھا؟

اسلام آباد (مانیٹرنگ ڈیسک) کیا کنگھی کرتے ہوئے آپ کے بال عام معمول سے زیادہ نکل رہے ہیں؟ تو آپ تنہا نہیں، درحقیقت دنیا بھر میں کروڑوں افراد کو عمر بڑھنے پر گنج پن کا سامنا ہوتا ہے۔ اب اس کی وجہ کچھ بھی ہوسکتی ہے جیسے ذیابیطس، وٹامن کی کمی، تناؤ، نیند کی کمی یا دیگر امراض مگر ایسا ہوتا ضرور ہے۔ یقیناً گنج پن کی جانب بڑھنا کس کو پسند ہوسکتا ہے مگر کچھ چیزوں کے ذریعے آپ اسے روک سکتے ہیں۔ اور ان میں ناریل کا تیل وہ عام چیز ہے جو لگ بھگ ہر گھر میں

ہی ہوتی ہے۔اگر تو آپ گرتے بالوں سے پریشان ہیں یہ تیل فائدہ مند ثابت ہوسکتا ہے۔ کیا آپ جانتے ہیں کہ ناریل کا تیل اور لیموں کا جوس ملا کر لگانے سے آپ اپنے بالوں کو لمبے عرصے تک سفید ہونے سے بھی روک سکتے ہیں۔ گرتے بالوں کی روک تھام کے لیے اس تیل کو کیسے استعمال کریں؟ اپنے بالوں کو شیمپو سے دھولیں۔ اب ناریل کے تیل کی کچھ مقدار کو کسی برتن میں گرم کرلیں۔ جب بال مکمل خشک ہوجائیں تو تیل کو بالوں پر لگا کر مالش کریں۔ اس کے بعد بالوں پر کنگھا پھیر لیں تاکہ تیل سر میں اچھی طرح جذب ہوجائے جبکہ ہر بال میں اس کی کوٹنگ ہوجائے۔ اس کے بعد بالوں کو کسی کپڑے سے 45 منٹ کے لیے ڈھانپ لیں یا چاہے تو ساری رات ڈھانپ کر رکھیں۔ اس کے بعد بالوں کو دوبارہ شیمپو سے دھولیں اور اس طریقہ کار کو مسلسل آزماتے رہیں۔ خشکی دور کرنے کے لیے ایلو ویرا جیل اور ناریل کے تیل کو اچھی طرح مکس کرلیں اور اس مکسچر کو سر پر لگا کر ایک گھنٹے کے لیے چھوڑ دیں، یہ مکسچر بالوں کی نمی بحال کرکے خشکی کا خاتمہ کرتا ہے جبکہ بال گرنے کے مسئلے سے نجات میں بھی مدد دیتا ہے۔